కొన్ని మూగతనాలు - Jayashree Naidu

 కొన్ని మూగతనాలు

వస్తూ...

పరచుకున్న పచ్చికనంతా

మూటగట్టి 

గుండె కు గ్రీష్మాన్ని కానుకగా ఇచ్చి వెళతాయి

కొన్ని

ఆకాశాన్నీ టాస్ వేసి 

వెన్నెల్లనీ 

వేకువల్నీ దోచేస్తాయి 

కొన్ని 

తొలి చిగురు చూపై

వేరువరకూ చేరని

నీటి ప్రేమౌతాయి 

మామూలుతనమవ్వలేని 

అనుభవాలన్నీ 

ప్రశ్నార్థకాలవుతున్నపుడు 

భారాల్ని రాసే ఘడియల్లో 

ఎన్ని పదాల్ని వూరడిస్తే 

ఓ కన్నీటి చుక్క కు తులాభారమౌతుంది..???

కాదిది దూరాభారం... - Jayashree Naidu

దూరం అడుగులేస్తోంది

దగ్గరను నెట్టేస్తూ..

కౌగిలించేంత దగ్గరలున్నాయి 

శ్వాసించిన క్షణాలున్నాయి 

క్షణాలు దారప్పోగులవుతున్నాయి

అనుభవాల్ని అల్లుకుంటూ...

భావం పరిమళించిన క్షణం

అదో విహంగ వీక్షణం 

పువ్వులు కనిపించని ముద్దిస్తున్నాయి

మరో మొగ్గకు చిగురవుతూ... 

ఇవేళ్టి గాలి కలగంటోంది 

అణువుల్ని నింపే పుష్పవనం కోసం 

వర్తమానమంతా అద్దంలో చూస్తోంది

గతకాలపు జ్ఞాపకాల ప్రతిబింబమౌతూ... 

అలంకరించుకుంటోంది

అలవాటుగా మారని అనిత్యంతో 

అరచేతులు రెండూ ఏకమౌతున్నాయి 

ఆ జ్ఞాపకాల దోసిలవుతూ... 

కాలమెంత సుగంధమో కదా

అక్షరాల్లోకి ఇమడనపుడు.

******** 19-01-2014

లైఫ్ ఈజ్ అ గేం - ప్లే ఇట్... Jayashree Naidu

చుక్కల్లా మినుకుమనే మాటల మధ్య

చిక్కగా అల్లుకునే ఆకాశపు మౌనం 

ఎన్ని చెప్పుకున్నా మళ్ళీ మొదటికే వస్తాం 

ఎందుకీ శబ్దపు అసందర్భాలంటూ

ఖాళీతనపు పాదాలు జరిపి

మాటకి కొంచెం చోటిచ్చి

మధ్యలో పలువరుసలు తళుకులద్ది

గుండె మరకల్ని దాచాలనే ఆత్రం 

అన్నీ తెలుసు

ఏదీ తెలీదు

సరిహద్దు రేఖ మనమే  

అటు నుండి ఇటూ 

ఇటు నుండి అటూ 

గందరగోళపడే అవకాశాన్నిచూస్తూ

మనసు ఆడుకుంటుంది జీవితమై 

లైఫ్ ఈజ్ అ గేం - ప్లే ఇట్... 

జవాబు లెరుగని ప్రశ్నలు - Maruvam Usha

జవాబు లెరుగని ప్రశ్నలు
~~~~~~~~~~~~~~

- ప్రశ్నల్లో ఎప్పుడూ ఏమీ ఉండదు. మనలో ఏముందో అది బయటికొస్తుందంతే...

1

కిటికీ అద్దానికి అతుక్కున్న తూనీగ కి
ఎగిరిపొమ్మని అరిచరిచి చెప్పాక,
అద్దానికి ఈవలి వైపు నాలో అలజడి

దాని రెక్కల హోరు అంటే నాకు మక్కువ: ఎందుకు?
నా వీపు మీద చరిత్ర వదిలిన మూటల బరువు ని మరిపిస్తాయనా!

ఈ జడత్వం లో నా అస్తిత్వమంతా ఒక్క మూసలోకి ఇరికిస్తూ,
తరాల కుబుసాలు విడవలేక,
ఈ ఒక్క అంతరాత్మ తో కలహిస్తూ పడి ఉన్నానెందుకు?

2

తామరాకు మీద బొట్టు బతుకు ఎందరికి తెలుసు?

అతుక్కుపోలేక, నిలవలేక, ప్రవాహం లో కలిసిపొలేక
ఆకు మీద నర్తిస్తూ..

విశ్వం పత్రం లా పరుచుకుని ఉంది
శయనించలేని దుర్బలతలో,
'లాలి పాట' ఎరుగని ఓ పసితనం,
యుగాల పర్యంతం నిద్రలేమి లో అలమటిస్తూనే ఉంది
మాట నేర్పిన మౌనం తో జతకడుతూనే ఉంది.

https://www.facebook.com/maruvam.usha

చిరు నీటి బిందువు -- Jayashree Naidu

మనసు బరువు కంటికే తెలుస్తుంది

కోత గుర్తు లేకపోయినా 

గుండె నడుగు జవాబు.. 

నవ్వులంత తేలిక కాదు 

ఉప్పదనం దాచుకునే చేదు

ఉరికే నదులు చిన్నబోయే

చిరు నీటి బిందువు

కరిగిన కలనుంచి పుడుతూ

ఖాళీని తీసుకెళ్తూ

 కళ్ళు నిండే హృదయం

మౌనం సముద్రం

కనుకొలకుల చెలియలికట్ట దాటి

తీరంలాంటి చెంప మీద జారే క్షణంలో

ఎన్ని ఇసకరేణువులవుతుందో ఆ కల

చెయ్యల్లే వొచ్చి  తుడుచుకునే వేళలో...

ఇదీ స్నేహమే -- Jayashree Naidu

స్నేహం చిక్కదనం 
అద్దమని అనుకుంటాం కానీ.. 
ఒక్కో సరస్సులో.. ఒక్కో మనస్సు..

కొన్ని హృదయాల్లో ఘాటుదనం వెనక దాగిన
తేట దనం ఓ పట్టాన చేతికందదు
చూపుకిమడదు 

ఒడ్డున కూర్చుని
మాసాల తరబడి ఆలోచనల 
సమాసాల విశ్లేషణలు నడుస్తాయి
వూరగాయ కమ్మదనం లా
వీళ్ళూ అంతే...
కొంచెం ఓపికనే నెయ్యిని ప్రక్కనే వుంచుకోవాలి మరి

the best friend for a YEAR 2014 -- Jayashree Naidu

Empty the capsule
Let the grains fill it

spices or sweetens
Time is the ingredient

the lake or snowflake
ocean or a pond....

is an empty space
before water filled it

the vacuum is a welcome
be it the first step for creation

the night emptied the heart
and the dawn lit its sky!

Learn to vacuum the thought
and let the heart stay young! 

No Resolution is the Best Resolution
:) Welcome New Year 
You are gonna be the best friend for a YEAR!