రాత్రంతా ఆకులమీంచి ఆకులమీద
రాలుతున్న వానచప్పుడు, బల్లలమీద
బొమ్మలాటవాళ్ళు మద్దెలమోగించినట్టు,
నేనిక్కడున్నానుగాని, నేనిక్కడ లేను.
మబ్బులు మాట్లాడుతున్న ప్రాచీనభాష
భూమికీ, అకాశానికీ, అంతరిక్షానికే
తెలుసు. అదేమిటో వివరించాలంటే
కొత్తగా నేనొక భాష కూడబలుక్కోవాలి
ఎన్నో వర్షాలు చూసాను, మబ్బులు
నాతో మాట్లాడటమిదే మొదటిసారి.
ఇట్లాంటి వర్షాలొక వందచూస్తేనే
నువ్వు శతవర్షాలు జీవించావంటారు
