మబ్బులోంచి చినుకులోకి... by AFSAR

మబ్బులోంచి చినుకులోకి...

----

ఆకాశం నేలకి రాసుకున్న ప్రేమలేఖ ఈ వాన
-ఖలీల్ జిబ్రాన్


1
కనిపించని వొక నిశితమయిన కుంచె
ఆకాశాన్ని అలా వొరుసుకుంటూ వెళ్ళిపోయింది
వొక దృశ్యంలోకి మనం
అందంగా వొదిగిపోయాం
అర్థాలు వెతుక్కుంటూ-

2
మబ్బులకు భలే తెలుసు,
మనిద్దరికీ ఏం కావాలో!

3
రాయలేని వొక ప్రేమలేఖ
గాలి అలలమీంచి కాసిని వాన చుక్కల బుగ్గల మీంచి
అలా రాసుకుంటూ వెళ్ళిపోయింది
హాయ్..రే...హాయ్...అని కూనిరాగం పాడుకుంటూ.

4
విడిపోడానికి నిరాకరించే
రెండు బిగి పెదవుల్లా
ఆకాశమూ నేలా.

5
ఇక
ఏక ధారగా వాన.