ఉమ్రుభర్ కోయి తుం నే పుకార్ కర్తె హై ఉన్ కా నాం; ఓ ఫిర్ నహీ ఆతే! శలభము, ఆత్మహననము, పార్వతీ కోసము మొదలైన ఆత్మవినాశనము. బ్రేక్ డాన్స్ వేరురా ఇది-హార్ట్ బ్రేక్. అర్ధరాత్రి దాటినా గూడు చేరని పక్షులుంటయి. సంజకెంజాయలు మాయమైనా ఆకాశం వీడని విహంగాలుంటయి. టైముకి ఇంటికెళ్లాలని రూలేమైన ఉందా.
ఒకసారి నవ్విపడేసిన జోకు మళ్లీవిసిరితే లాభంలేదు. కానీ బాధ అలాకాదు. ఒకసారి దు:ఖపడి వదిలేస్తే పోయేదా? వెన్నులో దిగిన బాకు లాగా-ఫిర్ వొహి యాదే! ంజానికి ఇట్స్ సో హార్డ్ ఫర్ మెన్. అందరూ అనుకునేది అబద్ధం. పురుషుల ప్రేమ కూడా నిబద్దం. నిజం చెప్పాలంటే బ్రేకప్ నుంచి కోలుకోడానికి యూ టేక్ మోర్ టైం దేన్ ఉమెన్ మై బ్రదర్. నీకు దేవుడి మీద నమ్మకం లేకపోతేనా ఇక ఆత్మహత్యే శరణ్యం....
కాని, కొంతమందికి సరళరేఖ మీద సాఫీగా సాగిపోయే సెటిల్డ్ లవ్ అంటే ఇష్టం. బట్ లవ్ నెవర్ సెటిల్స్ డౌన్-ఎప్పటికప్పుడు స్కోర్లు సెటిల్ చేసుకోడంలోని అలజడిలోని ఉత్కంఠ! ఎక్సైట్మెంట్ లేని రెలేషన్షిప్ ఎందుకురా దండగ.
పుట్టు, పెరుగు, పెళ్లాడు, పిల్లల్నికను. మరెప్పుడు ప్రేమ. రేఖ ఏమని చెప్పింది. ట్రూలీ డీప్లీ ఇన్సేన్లీ స్పెషల్లీ హోప్లెస్లీ ఇన్ లవ్. హోప్ లెస్ గా ప్రేమించడమా? ప్రేమలోని తీవ్రవాదమా. మహర్షి గాడి అరాచకమా. దునియా భర్ లవ్ లీజియేగా: ఐ హావ్ ఇట్ ఫర్ హిం! (ఓ ఇంటర్వ్యూలో అమితాబ్ గురించి రేఖ)
అయితే జీవితమంతా ఎవరి నామస్మరణలో కాలం గడిపామో వాళ్లే తూచ్ అంటే ఇక ఈ జీవితమెందుకు. బట్ రేఖ నెవర్ గేవ్ అప్. తు బదన్ మై హు ఛాయా, తు నహో తొ మై కహా హు?
మొపాసా పిపాస వీడలేదు. ప్రేమల కోసం హ్రుదయ కోశాల నుంచి కురిసే అమ్రుతధారల కోసం బిచ్చగాడై తిరిగాడు కదా. ఇది తీరని దాహం. రాజేష్ ఖన్నా దేశాలు పట్టిపోయాడు. వో...ఫిర్ నహీ ఆతే!
స్రుష్టిలో తీయనిది స్నేహమేనోయి. ఎయిటీస్ హైస్కూలు బంధాల కొటేషన్ ప్రకారం స్నేహం తీయనిదైతే, ప్రేమ? ఒక్క రుచి కాదు గురూ అమ్రుతం తాగితే చావుండదు. పలురుచులు లేనిదే బతుకుండడు. బంపీరైడ్ లోని థ్రిల్ సాదాసీదా సగటు కుటుంబప్రేమలో పండదు. తీపీ పులుపు కారం చేదూ కలగలసిన అనుబంధం నిరంతర నూతనం.
అనుబంధాలన్నీ కాలపరిమితితో పుడుతున్న వేళ. టైం టూ టైం రెఫ్రెష్ బటన్ నొక్కకపొతే నిలవని ప్రేమ. పరస్పర వ్యతిరేక వ్యక్తుల మధ్య ఐక్యత-ఘర్షణ. ఫ్రిక్షన్ లోంచి కొత్తదనం. కొత్తదనం లోంచి ప్రణయపరిమళం. కొంచెం స్ప్రే కొట్టుకోవాలి గురూ. ఎందుకంటే నిలబెట్టుకోడం ఓ ఫీట్. ముఖ్యంగా ప్రేమను. పాతకాలపు సెటప్ సంగతేమోగానీ కొత్తకాలంలో సర్కస్.
ఇక్కడే కదా అసలు ఎక్సైట్మెంట్ జలజల ప్రవహించేది. నిరంతరం గెలుచుకుని నిలబెట్టుకోడంలో నీతో నువ్వే పోటీపడడంలో ఏజ్ లెస్ రొమాన్స్! పాంపర్ చేసి, ప్రయిజ్ చేసి అలిగి, తొలగి. గెలిచి, ఓడి.
ఈ సందర్భంగా ఓ కొత్తసంగతిరా కొలంబస్. అభం శుభం తెలియని పిచ్చిపిల్ల తప్ప తెలివిడి ఉన్న లేడీ ఎవరూ నిన్ను నిన్నుగా ప్రేమించదు. అది శ్రీశ్రీ గారితో ఎండ్ అయిపొయిన ఆశ. దునియా భర్ లవ్ లీజియేగా, ఐ హావ్ ఇట్ ఫర్ యు అని ఈ తరం హీరోయినెవరూ చెప్పదు. అది రేఖ చెప్పిన ఆఖరి డైలాగ్. న్యూ ఏజ్ లవ్ లో విజేతలవ్వాలంటే, జీవితం లోనూ గెలిచితీరాలి. గెలుస్తూనే ఉండాలి. గెలుస్తూనే చావాలి. యూ లాస్ట్ లైఫ్, యూ లూజ్ లవ్. ప్రేమంటే సులువు కాదురా. అదొక కెరీర్. ఎప్పుడూ ఫాంలో ఉండాలి. లేదంటే యువార్ అవుటాఫ్ గేం.
ఆడకపోతే థ్రిల్ లేదు. థ్రిల్ లేనిదే బతుకు లేదు. బతుకంటే ప్రేమ. ఒకపరి తిరస్కారం. ఒకపరి పురస్కారం. రోలర్ కోస్టర్లా సాగే ప్రేమ. ఇన్సేన్ అండ్ హోప్లెస్!
కాని గురూ ఎన్నిచెప్పుకున్నా ఒక పాట మాత్రం వాడిపోదు-మరపురాని బాధకన్నా మధురమేలేదూ. ఆ మాధుర్యం కోసమే పిపాసులవుతాం. శలభాలవుతాం. బాటంలైన్-ప్రేమ: వైల్డెస్ట్ పెయిన్!
అందువల్ల చేత-ఓదార్చుటకు నీవెవరు? ఓదార్పుకు గురియగుటకు నేనెవరు?
-అరుణ్ సాగర్
(మియర్ మేల్ కవితాసంపుటి లోని లవ్వాలజి (ట్రియాలజి)లో రెండవ పీస్)
